Toes xuntes y en mesmu llau (2)

Parez evidente qu'al presidente d'Asturies, Vicente Alberto Álvarez Areces, nun-y gusta ser presidente d'Asturies. Él seguramente quedría más ser ministru o secretariu d'estáu, y yo camiéntome que nun desespera de llegar a selo un día. Vaya, tener dalgún cargu curiosu en Madril que-y permita prosperar. Sí, prosperar, esi conceptu que de mano ye ayén a la política, pero que tan presente ta ente los que decidienon vivir de "sirvir al pueblu" y confunden peligrosamente la so traxectoria na res publica cola medría personal. Esta situación particular (más común de lo que sería sano) tien muncho que ver cola falta d'amor a los colores, col complexu d'inferioridá y cola baxa autoestima del que siempre punxo'l güeyu y les referencies fuera de la so tierra, aparte de con una idea enferma y dexenerada de la política. En cualquier casu, les aspiraciones de caún son mui llibres, y allá'l señor presidente coles sos zunes. Mentanto y non, lo qu'habría que-y esixir como mínimo ye que guardara les formes y que nun fixera despreciu públicu de los trazos culturales y identitarios d'esti paisín que gobierna con tan pocu rixu como aciertu.
Esti mesmu día, el periódicu del Movimientu, que si se fundara agora volvería llamase igual, espublizaba una entrevista col señor presidente d'Asturies, na que se podía ller esta perla de la falta de vergüenza política:

LNE: –Si se lleva el hecho diferencial, ¿deberíamos plantearnos la cooficialidad del asturiano?
VAAA: –Cada territorio debe hacer valer sus derechos sin buscar elementos de diferenciación, sino de integración. Asturias tiene suficientes elementos de identidad para no tratar de reforzar lo que nos separa de los demás.

Asoráu me dexa'l señor presidente. ¿Tenemos que deducir de les sos palabres que los elementos que nos diferencien de "los demás" son negativos y nun merecen l'atención de los poderes públicos? Si ello ye asina, ¿tendremos que dir pensando en dexar cayer ún a ún los monumentos prerrománicos, que nos confieren una personalidá marcadamente diferenciada y, polo tanto, supuestamente negativa? ¿O ye que, según él, hai elementos identitarios positivos y negativos, y la llingua –qué casualidá– entra dientro de los negativos? ¿O quiciabes lo que pasa ye que'l prerrománico ye un elementu "integrador" y l'asturiano una realidá "xebradora"? Cuando'l señor presidente fala de «hacer valer sus derechos», ¿pasaría-y pela cabeza en dalgún momentu que la reivindicación de la oficialidá lo que busca ye la reconocencia d'unos derechos cívicos que los sos alministraos nun pueden exercer con llibertá? ¿Sabrá esti pedazu de cachu de presidente que cualquier elementu diferencial de la cultura d'un pueblu desepara y integra al empar, que la llingua ye ún de los elementos de mayor potencia integradora d'una sociedá, que la diversidá de llingües y cultures ye natural y nun tien absolutamente nada de malo?
Pero non, estes coses nun van esmoler al señor presidente. Él ta bien garraú, y a les razones que-y doi siempre podrá oponer los sos mayucos clixés de siempre: que nun hai demanda social, qu'esta región nun precisa la oficialidá, que les polítiques llingüístiques que se llevanon alantre hastasagora son les más prudentes y acertaes... Que siga per esi camín pel qu'anda tan cómodu. Pero que nun se sorprienda si un día-y echen en cara que la so visión negativa de la diversidá cultural ye propia d'un nacionalista español integrista y xacobín, qu'en mui poco se diferencia de la del franquismu. O si daqué día (que los dioses quieran cercanu) los propios asturianos decidimos pidi-y cuentes por esa parte tan importante del nuestru padremuñu cultural qu'él, arrémente y por prexuicios provincianos, se negó a xestionar. Porque eso ye lo mínimo que se-y puede pidir a un políticu: que xestione y faiga medrar los activos que recibió al llegar al poder. El señor Areces ta dexando morrer la bayura que recibió, y eso daquién tendrá que-y lo demandar dalgún día: porque ye culpable d'ello y, polo tanto, un mal presidente. Una llaceria más nesti desgraciáu país gobernáu pola indolencia y la mediocridá.