15.9.04

Toes xuntes y en mesmu llau (3)

El periódicu del Movimientu ta verdaderamente empeñáu en metenos na cabeza, pali que pali, la so visión anacrónica, proxectista y españolísima de la historia d'Asturies, por antiguu y allongáu que sea l'episodiu del que se trate. Agora, esti día, resucitando l'espíritu falanxista de la «unidad de destino en lo universal», el redactor del periódicu del Movimientu describe con supuesta neutralidá periodística les conclusiones de los descubrimientos arqueolóxicos que se tán faciendo pelos altos de La Carisa (¿una vieya Via Carisia?), ente L.lena y Ayer. La noticia fala de la organización guerrera de los ástures a la hora de facer frente al invasor romanu, y de la fuerte identificación col territoriu que demuestren les defenses agora descubiertes. Quier dicise, una noción de patria, que'l mesmu redactor se ve obligáu a reconocer. Con too y con eso, el periódicu del Movimientu échanos una bona pingarata de la so melecina más eficaz, y nun puede dexar d'emplegar el términu col qu'establecen día a día, pali que pali, la so categorización d'Asturies, la so definición succinta, minimalista, cuasimente subliminar, en términos políticos:

Los indígenas subieron a defender la región en su misma «puerta de entrada», a 1.700 metros sobre el nivel del mar. Su objetivo, que, al final, no tuvo éxito, era evitar el acceso de los invasores a los valles del centro de la región. Su región.

La región. Su región. Esa cosa eterna que yá esistía primero de Roma y que, de manera natural, pervive hasta hoi. La región. Su región. Los anacronismos nun esisten cuando falamos de la región. La región yá taba equí cuando los romanos, cuando los ástures, cuando los comedores de mariscu del asturiense. Ello yá yera la región. Y primero tamién. Muncho primero. Porque Dios, cuando creó'l mundo, creó la región. Parez ser que foi depués de crear la tierra y la mar, pero neso les interpretaciones de los eséxetas nun acaben de coincidir.
La región. Su región.
La puta región.

Nenhum comentário: