Qué va ser esto

Nin siquiera yo sé qué va ser esto, esta cosa de perfiles voluntariamente esborriaos qu'echa a andar una tarde de domingo toldada y agostiza. Nun sé si dalgún compañeru, compatriota o conxénere cadrá dacuando per esti partaz internéticu a ller estes caxigalines qu'arreflundio al espaciu electrónicu col mesmu espíritu del que tira a la mar un mensaxe nuna botella: con más esperanza que convencimientu.

Non, nun sé qué va ser esto, si va ser más diariu que weblog, más reflesivo qu'informativo, más blanco que prieto, más tirio que troyano. En tou casu, lo más fácil ye que les coses se muevan nesi territoriu intermediu que permite facer camín cola comodidá relativa de nun tener que se definir nin s'etiquetar más de la cuenta. Y dende esi territoriu indefiníu, mistu y mestu, dende una Asturies cuándo fosca, triste y desesperante, cuándo (tovía) nueva, sorprendente y emocionante, cuento dir echando periódicamente a la mar les mios botelles verdes con nota dientro. Perdonái que dacuando los papeles vengan puercos de sidre, de rabia, de salmoria, de sangre, de cucho o de tristura. La vida ye asina de revuelto y eso ye lo qu'hai. Pelo menos quédanos el derechu a espatuxar y la ilusión d'esconxurar coles palabres la tantes veces triste, ruina y puerca realidá.

Si hai daquién al otru llau, salú.